शिशिर भट्टराई : सिर्जना (साहित्यिक विधा)

Monday, July 26, 2021

आँखामै राखौँ जस्तै छौ, घरमै डाकौँ जस्तै छौ,

चाख्नलाई मिल्ने भए त खुसुक्क चाखौँ जस्तै छौ ।

काटेर दिन मिल्दैन, साटेर लिन मिल्दैन,

बाँड्नलाई मिल्ने भए त थोरथोरै बाँडाैँ जस्तै छौ।

कसैले लान्छ होला कि भनेर लाग्छ सधैँ पिर,

बाँध्नलाई मिल्ने भए त हातैमा बाँधौँ जस्तै छौ।

लेखेकै छैन सुन्दैछु, चोटिलो गीत प्रीतिकाे,

नाँच्नलाई मिल्ने भए त बोकेरै नाँचौँ जस्तै छौ ।

चौबन्दी चोली सिउथ्यौ कि जान्दिन आफू के गर्नू,

नाप्नलाई मिल्ने भए त आफैँले नापौँ जस्तै छौ ।

(शिशिर भट्टराई, इलाम)

सामग्री सूची